كيك الجزر

السلام عليكم ورحمة الله وبركاته

من خلال بحثي بالنت لعدة وصفات للحلويات
وبعد كذا تجربه
حصرت وصفات لذيذه وسهله وسريعه
حبيت اشاركم فيها
كلها من شغل ايديني
ان شاء الله تعجبكم وياريت يتثبت الموضوع لانه راح يكون متجدد باذن الله
نبتدي على بركة الله
اولا:
تطبيقي لـ كيك الجزر مع الفروستنج
المقادير
1/2 كوب جوز مفروم ويفضل محمر بالفرن قليلا
2 كوب جزر مبشور (حوالي 2-3 جزرات كبار)
1 تفاحه كبيره مقشره ومبشوره
1 1/2 ملعقه شاي قرفه
1 كوب جوز الهند (بودره)
والكيك خذيته جاهز ((بيتي كروكر اللي مكتوب عليه germen chocolate))هذي صورته

تتبعون طريقه الاعداد وشكثر ياخذ وقت بالفرن
استخدمته لان مضبوط وابدا مايفشل والذ بوايد من الطريقه العاديه
مقادير الفروستنج((الصوص الابيض اللي فوق الكيك))
1/4 كوب زبده لينه (بدرجه حرار الغرفه)
علبه فلاديلفيا او 8 حبات كيري
1/2 ملعقه شاي فانيليا
وللتزين شرايح لوز محمره بالفرن
الطريقه
سخني الفرن على درجه 180 اولا وخلي الرف في نص الفرن
بعدين تخفقين البيض لين يتضاعف حجمه على السرعه العاليه
تخففين السرعه وتضيفين مقادير الكيك اللي في العلبه
تضيفين عليه القرفه ((الدارسين))
وتخلينهم ينخلطون مع بعض من 2-3 دقائق على السرعه المتوسطه
وتضيفين عليهم جوز الهند
بعدين بالملعقه الخشبيه اتضيفين التفاح المبشور والجوز
والجزر المبشور وتحركين من الاسفل الى الاعلى بخفه
تدهنين صينية الفرن بالزبده مع الطحين
وتخبزين الكيك على الوقت المحطوط على العلبه
طريقة التغطية الفروسنج ((لذيذه بشكل خيالي ))
تخلطين كل المقادير مع بعض في الخلاط او معدة الطعام ((فود بروسسر))
وتخلينه على جنب
تبردين الكيك
وتحطين عليه التوبينغ ((الفروستنج))
وتحطين عليه شرايح اللوز المحمره بالفرن والف صحه وعافيه
ثانيا:
تطبيقي لـ السينابون
جربته بطريقتين
خذت السينابون جاهز من محل السينبون
طلبته من غير اي اضافات
سويت له صوص ابيض بطريقتين والثنتين كانو حلوين
الطريقه الاولى: جبن كيري +زبده + رشه فانيلا
خلطتهم كلهم بالخلاط لين تجانسو طبعا بتكون هشه ومب سائله
الطريقه الثانيه :
ل 8 حبات سينابون استخدمت علبه حليب محلى نستله
+ 12 مربع كيري
ل 6 حبات سينابون
3/4 ارباع علبة حليب محلى
8 جبن كيري
خلطتهم بالخلاط بعد وهني صار الخليط شبه سائل
للتزين استخدمت صوص شوكولا هيرشي +
صوص كراميل هيرشي
وجوز محمص بالفرن
خيالي الطعم خاصة ان الصوص الابيض وايد معطي طعم رائع
ثالثا:
تطبيقي لـ كريم كراميل بالاوريو
شفته في كذا منتدى عجبتي فكرته لان معاه اوريو
المقادير
2 كريم كراميل
2 قشطه حجم كبير
لتر حليب المراعي
مغلفين اوريو
الطريقه:
يحضر الكريم كراميل بالطريقه المعتاده اللي كلنا نعرفها
مع اضافه القشطه
في البايركس نحط السكر المحروق اللي ايي مع الكريم كراميل
ونكسر فوقه الاوريو
نسكر الوحده لاربع قطع
ملاحظة هامه جدا: لازم تشيلون الكريمه البيضه اللي داخل الاوريو
فكره ثانيه: تقدرون تصفون الاوريو حوالين البايركس
وباستخدام ملعقه الشوربه الكبيره تضيفون مزيج الكريم كراميل
على مهل عشان مايتحركون القطع بيصير شكلهم وايد حلو مع التقديم
رابعا:
تطبيقي لـ حلى المانجو
هذي له كذا طريقه ووصفته قديمه جدا بس عن جد لذيذه
المقادير:
1 بسكوت قهوه الصباح
2 ظرف دريم ويب
1 قشطه حجم صغير
6 حبات جبن كيري
ملعقتين كبار حليب المراعي لتشريب البسكوت
نص علبه عصير مانجو الربيع الطبيعي
شرايح مانجو
او شرايح كيوي
او علبه فواكه مشكله
الطريقه
نصف البسكوت في البايركس تقريبا بيتصير كذا طبقه من البسكوت
بعدين نشرب البسكوت بالحليب
في الخلاط نضيف المقادير بهذي الشكل عشان نضمن امتزاجها بشكل جيد:
القشطه+الدريم ويب+العصير+جبن الكيري
نخلطهم بشكل جيد بس لازم تكون ثقيله
مالازم تكون بشكل سائل عشان تتماسك
نضيفها على البسكوت
نضيف شرايح المانجو
او شرايح الكيوي او الفواكه المشكله ونخليها بالثلاجه على الاقل 6 ساعات عشان تبرد وتتماسك اكثر
هذي شكلها